Pangungulila

Sa nayon, mabigat na umuusad ang sandali
sa pagsalubong sa gabi.May tagulaylay ang takipsilim.
Maagang humihimlay ang alikabok
sa makipot at baku-bakong lansangan.
Parang nagmamadaling uwang
ang kadkad ng papauwing paragos.
Namamaalam ang paminsan-minsang
tilaok ng manok sa kalayuan.
Tahimik na ang kanina’y sumisipol
na hangin sa kaparangan.
Bumubulong ang alingawngaw ng halakhakan
ng mga batang naghabulan sa palibot ng mandala.
Humihigpit ang yapos ng liwanag
ng gasera sa umuuswag na dilim.
Lumalamig ang pagtitig ng nagmulat na buwan.
Sa nayon, ganito ang pagsapit ng gabi
buhat nang mawala ka.