Kahon-kahong Pananaw

Iniluluwal siya

ng isang kahong kariton

bago magluwal ng liwanag ang umaga.

Ikinakahon siya

ng isang bundok na bunton

sa daigdig ng mabahong basura.

At siya'y pilit umaahon.

Araw-araw siyang nagluluwal

ng bunton ng pag-asa

mula sa kaniig na basura.

At hindi siya ginigimbal

ng panis, lansa, dura at dugo,

bangaw at uod.

Ngunit ngayong umaga,

ginimbal siya ng isang munting kahong

naglalaman ng kaluluwal

na sanggol ng isang inang

nagimbal sa kawalan ng pag-asa.