Sa *Tuklong

Nagkakagulo sa baryo,
marami ang nagtataka,
dahil nawala ang santo.

Kagagawan ng demonyo,
ang sabi ng nananata,
nagkakagulo sa baryo.

Pintakasi’y nagtatampo
ang sabi ng nagtitika,
dahil nawala ang santo.

Kaya’t magtayo ng bago,
o lumipat ng kapilya.
Nagkakagulo sa baryo.

Kasunod nito ay bagyo,
o sumpang iba’t iba
dahil nawala ang santo.

Ay! Puno ng amorsiko,
lumabas isang umaga!
Nagkakagulo sa baryo
dahil lumitaw ang santo!

* bisita, kapilya